Девятернялылар рубин туй көнендә сайлау участогына килделәр

Девятернядан Муллаян-Әнсәрия Бакировлар өчен быелгы 17 март аеруча истәлекле. 

–    40 ел элек туган авылыбыз авыл Советында язылышкан идек. Әле кичә генә кебек, – диләр алар.
Хөрмәтле гаиләнең тормыш юлы тырыш хезмәттә узган. Муллаян ага гомер буе К.Маркс, аннан “Игенче” колхозларының алдынгы шоферы булган. Әнсәрия апа заправкада, складта, бухгалтериядә хезмәт куйган. Хуҗалыкларында мал-туар асрап, тырышлык белән көн күргәннәр. Әле бүген дә бу шөгыльләренә тугры калалар. Тату гаиләдә өч бала тәрбияләп үстергәннәр: ике кыз, бер малай. Аларның барысы да гаиләле булып, 6 оныкның яраткан әби-бабасы алар бүген. 

–    Менә шушы балаларның якты киләчәге өчен тавыш бирергә килдек. Илебезгә тотрыклылык, иминлек телибез, – диделәр Бакировлар. – Гаиләгә нигез салынганнан бирле бер генә сайлаудан да калмыйбыз. Без шулай күнеккән инде.