Бүген – мәктәпләрдә чыгарылыш кичәләре

Районыбызның 138 укучысы өчен дулкынландыргыч та, сөенечле дә мизгелләр килеп җитте. Сез 11 ел белем алган туган мәктәбегез, хөрмәтле укытучыларыгыз белән саубуллашасыз. Әти-әниләрегездән аерылып мөстәкыйль тормышка аяк атларга җыенасыз. Мәктәп тормышы, бәйге-ярышлар, конференцияләр, бердәм дәүләт имтиханнары – барысы да артта калды. Алда – олы тормыш. Уку йортларына керү, студент еллары...

Сезнең үз алдыгызга куйган максатларга ирешәчәгегезгә, хыялларыгызны тормышка ашыру юлында сынатмаячагыгызга, кыю, үҗәт, белемле, эшлекле егет-кызлар булачагыгызга ышанам һәм зур уңышлар телим.

Кайда гына яшәсәгез дә, нинди генә дәрәҗәле урыннарда эшләсәгез дә, иң мөһиме, белем биргән укытучыларыгызны, сезнең өчен утка-суга керергә әзер булган әти-әниләрегезне онытмагыз. Хәерле ак юл сезгә, егетләр-кызлар! Сәламәтлек, бәхетле гомер насыйп булсын үзегезгә!

Хөрмәт белән район башлыгы Валерий МАКАРОВ.