9 Май көнне традицион “Үлемсез полк” акциясе ничек узачак?

Традицион “Үлемсез полк” акциясе 9 Май көнне уза һәм ул быел Әгерҗедәге эксплуатацион локомотив депосы янындагы Билгесез солдат һәйкәле яныннан старт ала.

Хәрби тимерьюлчыны гәүдәләндерүче әлеге һәйкәлгә Бөек Җиңүнең 75 еллыгы уңаеннан реставрация ясалган иде.

– Һәйкәл янында митинг узачак, аның янына чәчәкләр салыначак. Аннан соң “Үлемсез полк” акциясенә старт биреләчәк, – дип бәян итте оешма­предприятие җитәкчеләре катнашында узган эшлекле киңәшмәдә социаль үсеш буенча бүлек җитәкчесе Татьяна Сергеева. – Әлеге чарада барлык оешма­предприятие җитәкчеләре дә катнашыр дип ышанабыз. Һәркем үзе белән балаларын, оныкларын алып килсен иде. Әлеге акция – үзе бер тәрбия чарасы бит ул.

 “Үлемсез полк” колоннасы Ометов урамы буйлап уза һәм аннан хәрәкәтен К.Маркс урамы буйлап дәвам итә.

Шушы ук көнне үзәк урам буйлап ретро­автомобильләр парады да оештырыла.