Әгерҗе районында язгы өмәләргә старт бирелә

ЧӘРШӘМБЕ, ҖОМГА – ӨМӘЛӘР
Традиция буенча быел да 1 апрельдән 31 майга кадәр Татарстанда санитар-экологик икеайлык уза. Ул чорда Әгерҗедә һәм авылларда атнага ике тапкыр – чәршәмбе һәм җомга көннәрендә өмәләр оештыру күздә тотыла. 
Бу чорда 
-    үзебез яши, эшли торган территорияләрне,
-    парк-скверларны, балалар мәйданчыкларын, 
-    бакчачылык ширкәтләрен, 
-    һәйкәлләрне, истәлекле урыннарны,
-    юл буйларын чистарту игътибар үзәгендә булачак.
Икеайлык барышында рөхсәтсез чүплекләрне бетерүгә аерым басым ясала. 

ШӘҺӘРГӘ – АЕРЫМ ИГЪТИБАР
“Әгерҗе шәһәре” муниципаль берәмлеге җитәкчесе Илнар Гыйззәтуллин шәһәрне чистарту һәм төзекләндерү буенча зур эшләр башкарылачагын әйтте.
–    Хәзергә кар тарату, боз чабу, чүп җыю кебек эшләр башкару көн кадагында тора. Шәһәрдәге учреждение-предприятие коллективлары белән бергә бу эштә эшмәкәрләрнең дә активлык күрсәтүе мөһим, – диде ул.
Йортларның, оешма-учреждениеләрнең тышкы якларына, керү уңаена да игътибар итү сорала. Баннерларны яңарту, бордюрларны буяу, элмә такталарны тәртипкә китерү, чүп савытларын тикшерү кебек эшләр дә күз уңында булырга тиеш.
Икеайлык барышында административ комиссия әгъзалары административ хокук бозулар буенча беркетмә төзүгә атна саен рейдларга чыгачак. Тәртип бозу очраклары булганда гаепле затлар административ җаваплылыкка тартыла.
17 апрельдә “Чиста яр буйлары”, 22 апрельдә Агач утырту көннәрендә оештырылачак өмәләрдә дә райондашлар активлык күрсәтерләр дигән өмет зур. Күпкатлы йортлар территорияләрен дә яшелләндерү бурычы тора. 
Өмәләргә җиң сызганып, бердәм булып кушылыйк, райондашлар!