Әгерҗедә 350 дән артык кеше «Җиңү диктанты» язды

3 сентябрьдә Әгерҗе районының 350 дән артык укучысы һәм педагогы "Җиңү диктанты" Бөтенроссия акциясенә кушылды. Алар сугыш һәм аның геройлары турында тарихи истәлекләрне барлады.

Быел дүртенче тапкыр үткәрелгән диктант темасы-1941-1945 еллардагы Бөек Ватан сугышы вакыйгалары буенча 25 төрле планлы биремне үз эченә алган.

Диктант язар алдыннан район мәдәният йорты һәм Әгерҗе шәһәренең 2нче мәктәбе сәнгать коллективлары чыгыш ясады. Чарада шулай ук тыл ветераннары да катнашты, алар сугыш вакыйгалары турында истәлекләр белән уртаклаштылар.