Әгерҗеле Руслан Камалетдинов Европаның иң биек ноктасын яулаган

3 сентябрь көнне, 9 сәгать буе менгәннән соң, Әгерҗедән якташыбыз Руслан Камалетдинов туристлар төркеме белән Европаның иң биек ноктасына менгән. Блогер-сәяхәтче егет Эльбрус тавының иң биек ноктасын - 5642 м ны яулаган.

"Һава торышына яхшы фараз акланмады, һәм шуңа күрә сез минем артымда биек тау түбәләрен, елгаларны һәм "Я хода, нинди матурлык!" түгел, ә буран, кар явуын һәм аяктан егардай җил исүен күрәсез", - дип бүлешә шәһәрдәшебез.

Искәртеп узабыз, элегрәк "Әгерҗе хәбәрләре" язганча, узган елның июлендә якташларыбыз Мордыбыйда туып-үскән Искәндәр Нурмиев, Пеләмештан Эдуард Михайлов, Бимадан Александр һәм Петр Ишпаевлар шулай ук Россиянең һәм Европаның иң югары ноктасы Эльбрусны яулаганнар идк. Алар Әгерҗе районы флагын 5642 метр биеклектә урнаштырдылар.