Ел саен дистәдән артык оя ясый

МАЛАЙ ЧАКТА УК ЯСЫЙ ИДЕМ

Тәүге сыерчык оясын ул мәктәптә укыганда ясап карый. Хезмәт дәресендә китаптан карый-карый ясаганым – әле дә истә, ди ул.

Шул вакыттан бирле бу шөгыльне ташламый. Райондашларга ул йортлар салучы, тәрәзә йөзлекләре, беседкалар гына түгел, бик матур сыерчык оялары ясаучы оста буларак та яхшы таныш.

–       Мин гомер буе электрик булып эшләдем. Ә анда бер тәүлек эшләп, ике көн ял итә идек. Ял вакытларында кулдан чүкеч, балта төшмәде, – дип елмаеп искә ала Рафаэль абый.

Күптән лаеклы ялда булса да, ул әле дә остаханәсендә матурлык тудыруын дәвам итә.

ОЯ САЙЛЫЙ ТОРГАН ЧАКЛАРЫ

–       Язны яратмаган кеше юктыр ул! Минем дә иң яраткан ел фасылы – яз. Бигрәк тә сайрар кошларның көньяктан туган якка кайткан вакытлары – иң күңеллесе, – ди Рафаэль абый.

Ә бу көннәрдә сыерчыклар тырыша-тырыша оя сайлыйлар икән. Рафаэль абыйның  агачларга, сарайларга эленгән дистәләгән оясының әле берсен, әле икенчесен “тикшереп” чыгалар кошлар.

–       Ә мин ишегалдына урындык алып чыгып утырам да аларны күзәтәм. Җырчы кошларның сайрауларын тыңлау да илһамландыра мине... – ди Рафаэль абый.

УКУЧЫЛАР ДА КИЛӘ

Оста янына Ямурза авылы балалары да еш киләләр. Рафаэль абый аларны язын – оя, кышын җимлек ясау серләренә өйрәтә. Үзләренә бүләккә дә бирә.

–       Менә шул балаларның берсе генә булса да өенә кайтып оя ясап караса, мин бик шат булыр идем, – ди ул.

Останың оялары бизәкле булулары белән дә аерылып торалар. Кайсына лалә чәчәге төшкән, кайберләренә яфраклар “очып кунган”.

–       Тәрәзә йөзлекләре ясаганнан калган калдыкларны ташламыйм, ояларны бизәү өчен кулланам, – ди Рафаэль абый.

Әнә шулай, оста ясаган ояларга кешеләр дә сокланалар, аларны сайрар кошлар да үз итәләр.

–       Бу миңа тагын да дәрт өсти, – дип елмая Рафаэль абый.

Рафаэль Сабирҗановтан сыерчык оясы ясау буенча киңәшләр

Оя өчен иң яхшысы – 2 сантиметр калынлыктагы нарат такта. Ояның биеклеге 35 сантиметрдан ким булмаска, киңлеге 20 сантиметрга якын, “ишеге”нең  диаметры 5 сантиметр итеп булырга тиеш. Түбәсен төбеннән 2-3 сантиметрга зуррак итеп калдыру шарт. Яңгыр үтмәсен өчен түбәнең алгы өлешен чыгарып калдыралар. Ояны чистарту уңайлы булсын өчен өске капкачын алына торган итеп тә ясарга мөмкин.

Әзер ояны көньяк-көнчыгышка каратып, җирдән дүрт-биш метр биектектә һәм аз гына алга авыштырып урнаштыралар. Болай иткәндә оя эченә җил-яңгыр керми, сыерчыкка да керү-чыгу уңайлырак була.