Әгерҗедә Кыш бабайлар парадка чыга

Берьюлы дистәләгән Кыш бабай, Кар кызын күрсәгез, нишләр идегез? Мөгаен, күңелегездә балачак белән бәйле иң матур мизгелләр өере кузгалыр иде. Быел Яңа ел алдыннан Әгерҗедә нәкъ менә шундый тойгылар кузгатырдай бик матур чара узачак.

23 декабрьдә Әгерҗедә беренче тапкыр Кыш бабайлар һәм Кар кызлары парадын уздыру планлаштырыла. Татарның Кыш, удмуртларның Тол бабае, марилардагы Йу"што"кугыза бердәм булып парадка чыгачак бу көнне. Парад 16 сәгатьтә "Яшьлек" паркыннан башлана һәм район Мәдәният сарае янындагы төп чыршы янында тәмамлана. Сүз уңаеннан: нәкъ менә шушы көнне Кыш бабайлар, Кар кызлары төп чыршыдагы утларны да кабызачак. Аннан биредә бәйрәм башланып китә. Флеш-моб, төрле уеннар, бәйгеләр - җыеп кына әйткәндә, бик матур, дәртле бәйрәм булачак биредә.

Парадта син дә катнаша аласың, хөрмәтле газета укучыбыз. Моның өчен, иң мөһиме, Кыш бабай йә Кар кызы киемең булу. Ә барлык шартларны беләсең килсә, 22835 телефоны буенча шалтыратырга кирәк. okagrys@yandex.ru электрон адресына хат-заявка юлларга да була.