Әгерҗегә Рөстәм Миңнехановның килүе көтелә

Шул уңайдан бу көннәрдә Әгерҗе урамнарында төзекләндерү, чистарту эшләре бара. Тимер юл вокзалына илтә торган Вокзальная урамына асфальт түшәлү шәһәрдәшләребез өчен зур шатлык булды. Шәһәребезгә ямь биреп торучы "Яшьлек" паркында яңа балалар мәйданчыклары барлыкка килде. Тиздән бик матур фонтан эшли башлаячак. Бу көннәрдә хезмәт коллективлары, яшьләр паркта өмәләрдә актив катнашалар. Шәһәр бәйрәменә кадәр өмәләргә чыгып, һәр йорт, оешма-предприятие тирәсен тәртипкә китерү - һәрберебезнең бурычы. Туган Әгерҗебезне бәйрәмгә ялт итеп кую һәм шул чисталыкны саклауда барыбыз да катнашыйк, хөрмәтле әгерҗелеләр.

Август урталарында Әгерҗедә тагын күңелле вакыйгалар көтелә. Гоголь урамында, әгерҗелеләрнең күптәнге хыялын тормышка ашырып, ЗАГС бүлегенең яңа бинасы һәм "кирпичка" микрорайонында клуб сафка басачак. Бу шатлыгыбызны уртаклашырга Президент Рөстәм Миңнехановның да килүе көтелә.