Исәнбай тавыш бирү участогына көн саен йөзгә якын кеше килә

Исәнбай Мәдәният йортында урнашкан 502нче тавыш бирү участогы 25 июньнән башлап иртәнге сәгать 8дән кичке 8гә кадәр сайлаучыларны кабул итә.

-Россия Конституциясенә төзәтмәләр буенча көн саен йөзгә якын тавыш бирүчене кабул итәбез, -  ди комиссия рәисе Эльза Кәримова.

Участокта барлык санитар-эпидемиологик таләпләрне төгәл үтиләр. Килгән һәркемгә маска-перчатка, бер тапкыр гына кулланыла торган ручка бирәләр, антисептик та куелган.

- Комиссия әгъзаларыбар да тәҗрибәле. Алар да барлык таләпләрне төгәл үтиләр. Дистанция саклана, участокка тавыш бирүчеләр күпләп кертелми, - ди Эльза Кәримова.

- Авылдашлар актив. 25 июньдә 96, кичә 105 тавыш бирүчене кабул иттек, - ди комиссия әгъзасы Гөлнара Исмәгыйлева.

Беренчеләрдән булып тавыш биргән мәгариф ветераны Фәтхия Зарипова Конституциягә төзәтмәләр халыкның тормышын яхшырту өчен башкарылган эш булуын ассызыклады.

 -   Төзәтмәләр илебез иминлеген кайгыртуга, гаилә кыйммәтләрен саклап калуга игътибарны арттыра, социаль гарантияләрне тәэмин итә, - диде ул.

#голосуетРТ