"Нефтехимик" хоккей клубының танылган спортчылары Әгерҗедә мастер-класс үткәрде

Түбән Камадан "Нефтехимик" хоккей клубы бүген тагын Әгерҗедә булды. Бу инде аларның икенче визиты - беренчесе нәкъ бер ел элек булган иде.

"Нефтехимик" хоккей клубы уенчылары: 10 нчы номер астында чыгыш ясаучы һөҗүмче Данила Попов, 21 нче номер астында чыгыш ясаучы һөҗүмче Денис Вихарев һәм 74 нче номер астында чыгыш ясаучы сакчы Алексей Пузанов Әгерҗе районы "Спорт мәктәбе" укучылары өчен хоккей буенча мастер-класс уздырдылар.

- Без икенче ел рәттән Әгерҗегә килеп, яшь спортчыларыбыз өчен мастер-класслар бирүче Түбән Каманың "Нефтехимик" командасын сәламләргә шатбыз. "Боз сараенда" күнекмәләр өчен шартлар шактый яхшырды. Узган ел биналарга капиталь ремонт ясалды, яктыртуны яңарту планлаштырыла. Барыгызга да файдалы күнекмәләр алырга теләп калабыз. "Спутник" хоккей командасының данлы исеме төрле матчларда йомгак ясаганда ешрак яңгырасын, ә безнең уенчылар мактау пьедесталларында призлы урыннарны саен ешрак алып торсын, - дип мөрәҗәгать итте район башлыгы Азат Вәлиев сәламләү сүзе белән.

Чара кысаларында Әгерҗе районының "Спорт мәктәбе" тренеры Әсхәт Наил улы Гарифуллин РФ хоккей Федерациясенең Дипломы һәм Истәлек медале белән бүләкләнде.

Бүгенге очрашу хоккейны популярлаштыруга, сәламәт яшәү рәвешен пропагандалауга, һәвәскәрләр һәм профессиональ хоккейга яшьләрне җәлеп итүгә, шулай ук үсеп килүче буынга тәҗрибәне тапшыру өчен менә дигән сәбәп булды, дип билгеләп үтә оештыручылар.