Анализлар тапшыруда мөмкинлекләр арта

Табибта кабул итүдә булганнан соң анализлар бирү өчен юллама алып чыгуга без күнеккән инде. Анализлар дигәнебез, гадәттә, сидек һәм кан була. Ә менә бер тамчы кан, сидекнең алга таба дәвалау билгеләү өчен бик тә кирәкле һәм мөһим мәгълүматлар алу чыганагы булып торуы турында күпләребезнең уйланганы да юктыр.

Анализларны тирәнтен тикшерү эше безнең Әгерҗе район үзәк хастаханәсе клиника-диагностика лабораториясендә дә башкарыла. Ә хәзер моның өчен шартлар тагын да яхшырды.  Заманча аппаратура, аларда эшләү өчен югары квалификацияле белгечләрнең булуы тапшырылган анализларның төгәл нәтиҗәсен алырга мөмкинлек бирә.     

Төп анализлардан тыш безнең лабораториядә гормоннарга, онкомаркерга да анализлар тапшырырга була. Шулай ук липидный профиль (холестерин фракцияләре) дип аталган анализлар җыелмасы бирү, анализлар аша организмда минераль алмашу ничек баруын белү мөмкинлеге дә бар. 

Әлеге анализларның барысы да урында тикшерелә. Димәк, нәтиҗәне көтү вакыты кыскара. Тагын бер уңайлылык: лаборатория белгечләре дәвалаучы табиб һәм пациент белән дә һәрчак элемтәдә тора.

Үзегезгә кирәкле анализны тапшыру өчен участок терапевтына, табибка кадәрге (доврачебный) кабинетка йә поликлиникадагы лабораториягә мөрәҗәгать итә аласыз. Аларда сезгә юллама бирерләр һәм анализны кайсы кабинетта тапшырырга мөмкин булуын аңлатырлар.
Татьяна ПОРОЗОВА,

клиника-диагностика лабораториясе мөдире.