Дөнья чемпионаты алдыннан Яңавылда футбол буенча ярыш уздырылды

Мәдәният хезмәткәрләре балалар арасында футбол ярышы үткәрде. Рәзинә апалары Османова бәйге уздырабыз, әзер булыгыз дип хәбәр бирүгә, малайлар көн-төн футбол мәйданчыгында туп типтеләр. Көндәшләре дә көчле һәм оста иде. Варкләд-Бодьядан килгән малайларның һәрберсе җиңү өчен җан атты. Ике команданың да уенчылары кырга бертөрле киемнәрдән чыктылар. Исем-девизлар да уйлаганнар. Бер-берсен сәламләгәннән соң, командаларга уенга старт бирелде. Беренче периодта Яңавыл командасы лидерлыкны үз кулында тотты. Икенче периодта Варкләд-Бодья спорт сөючеләре очколарны тигезләде.  

Исәп 9:9 булды.Уенчыларга өстәмә вакыт бирелде. Бу вакытта җанатарларны күрсәгез иде. Алар командаларга көч биреп сызгырдылар, кычкырдылар. Җиңү Варкләд-Бодья командасына елмайды. Әмма Яңавыл уенчылары төшенкелеккә бирелмәде, алар үзләрен чын спортчылар кебек тоттылар.

Уен тәмамлангач спортчылар казанда пешкән боткадан сыйландылар, рәхәтләнеп күңел ачтылар. Саубуллашканда Варкләд-Бодья уенчылары безнең спортчыларны үзләренә кунакка чакырдылар. Димәк, әле футбол ярышлары дәвам итәчәк.

Гөлназ МӨХӘММӘТДИНОВА.

Яңавыл.