Әгерҗенең кызлар футбол командасы республикада – чемпион

Әгерҗенең "Кадетлар" футбол командасы белем бирү учреждениеләре арасында уздырылучы спартакиаданың республика этабында җиңү яуладылар.

Татарстан башкаласында узган ярышта зона турларында җиңгән алты команда - Казан, Әлмәт, Чүпрәле, Саба, Аксубай, Әгерҗе районнарыннан футболчы кызлар катнашты.

Әгерҗе командасы биш көндәшен дә җиңүгә иреште. Нәтиҗәдә, 15 очко туплап чемпион исеменә лаек булдылар.

- Казан командасы капкасына ике период эчендә алты гол кертүгә ирештеләр шәкертләрем. Ә менә Чүпрәле кызлары белән тырышырга туры килде. Җиңел атлетика белән шөгыльләнүче көндәшләргә күз иярмәде. Әмма безнең кызлар аларны барыбер 1:0 исәбе белән җиңде, - ди тренер Илдар Идиятов.

Әгерҗе шәһәренең 2нче мәктәп футбол командасы, шулай итеп, республикада дүрт тапкыр чемпион исеменә лаек булды. Бу ярышта икенче урынны - Чүпрәле, өченчене Казан командалары алды.

Ярыштан кайтуга ук кызларның тренировкалары башланды. Ике атнадан алар Ульяновскида узачак Идел буе федераль округы спартакиадасында Татарстан данын яклаячаклар.