Якташыбыз Эдуард Мираев "Татарстар" республика конкурсының ярымфиналына чыкты

Татарстанда «Татарстар» халык онлайн-тамашасы һәм башкаручылар бәйгесенең икенче сезоны башланды. Бәйгедә һәвәскәрләр дә, профессионаллар да, кыскасы, җырларга яратучы һәркем катнаша ала. Икенче сезонның беренче чыгарылышына җибәрелгән 370 гаризадан 10 катнашучы сайлап алынды һәм бишесе генә ярымфиналга үтте.

Алар арасында якташыбыз Эдуард Мираев та бар. Ул «Татарстар» онлайн тамашасының 2 сезонының сайлап алу этабының 2 нче чыгарылышында җиңү яулады.

Сайлап алу туры 16 августта 19:00 сәгатьтә турыдан-туры эфирда узды. Йолдызлы жюри: Минтимер Ногманов, Артур Шамгунов, Руслан Сабиров, Динар Нигъмәтҗанов, үз балларын куеп, катнашучыларның иҗатын бәяләделәр. Шулай ук тамашачылар өчен тавыш бирү дә узды.

Чираттагы сайлап алу чыгарылышы - 23 августта, ике ярымфинал - 30 августта һәм 6 сентябрьдә, ә көтеп алынган финал-13 сентябрьдә узачак.

Төп бүләк - үз авторлар җырын язу,клипны профессиональ төшерү һәм аны социаль челтәрләрдә таныту.

 Фото: Эдуард Мираевның шәхси архивыннан