Әгерҗе районыннан 22 егет хәрби хезмәткә алынды

Районнан бу кадәр күп егетләрнең күптәннән хәрби хезмәткә алынганы юк иде. Язгы чакырылышта барлыгы 45 кеше армиягә китәргә тиеш. 

Туган илгә хезмәт итәргә китүчеләр арасында Илмир Закиров та бар иде. Аны әти-әниләре һәм туганнары озатырга килгән.

“42 ел элек, 24 июньдә, мин үзем армиягә киттем. Новосибирскида хезмәт иттем. Балаларга карагач, яшьлегем искә төште», - дип, үз фикерләре белән бүлеште әтисе Габденур Закиров. «Армия - яшьләр өчен мөһим мәктәп», ди ул.

 
“Армия хезмәтендә егетләр чыныгалар һәм дисциплинага өйрәнәләр, чын ир-егетләр булып өйләренә кайталар. Армия мәктәбе кешене гомер буе озата бара, - диде, Илмирның әтисе Габденур абый. 

Илмир - актив егет, “Җиңү волонтерлары” һәм “Яшь гвардия”төркемнәре вәкиле булган, машинист ярдәмчесенә укыган. Ул да әтисе белән килешеп, армиядә хезмәт итүне һәр егетнең изге бурычы дип саный.