Әгерҗегә иң оста шигырь сөйләүчеләр җыелды

Бүген Әгерҗедә Ватанны саклаучылар, Бөек Җиңүнең 80 еллыгы һәм Габдулла Тукайның тууына 140 ел тулу уңаеннан “Шагыйрьләр җиңү җырын язалар, халык данын яуладылар ...” дип исемләнгән республика бәйгесенең район туры узды. 

Бәйгедә 2, 3, 4нче шәһәр, Иж-Бубый, Тирсә, Көчек урта, Ямурза башлангыч мәктәбеннән 25 укучы катнашты. 
Укучылар башкаруында Муса Җәлил, Хәсән Туфан, Роберт Миңнуллин, Фатих Кәрим, Әхмәт Ерикәй, Сибгат Хәким һәм укучыларның үзләре язган шигырьләре яңгырады.

Бәйгедә катнашучыларның чыгышларына Р.Миңнуллин исемендәге Республика балалар китапханәсе директоры урынбасары Гөлнар Иксанова, Татарстан Язучылар берлеге әгъзасы Наилә Харисова, район мәгариф идарәсе методисты Люция Терентьева бәя бирделәр.

Барлык катнашучыларга Дипломнар тапшырылды. 2нче мәктәптән Риназ Камалтинов, Иж-Бубыйдан Рулана Шахтина, Көчектән Софья Михайлова – җиңүчеләр. Алар Казанда узачак республика этабында сыналачаклар.