Әгерҗелеләр – “Әниләр марафоны”нда

Казанда "Туган авылым" милли комплексында #әниләрмарафоны2025 йомгаклау тантанасы узды. Аны оештыручы һәм уздыручы – Көчек авылында туып-үскән якташыбыз, хәзерге вакытта Казанда журналист булып эшләүче Динара Әхмәт. Анда безнең районнан 21 көн дәвамында әлеге марафонда катнашкан район үзәк китапханәсе директоры Чулпан Нурмөхәммәтова, үзәк китапханә хезмәткәре Миләүшә Шәйхетдинова, 1нче гимназия мөгаллимәсе Әлфинә Ризванова чакырылды. 
ТР Дәүләт Советы, Татар конгрессы, Казан мериясеннән килгән вәкилләр әниләрне котлап иң изге теләкләрен җиткергәннәр. 

Спикерларның чыгышлары да бик эчтәлекле, файдалы булган. Катнашучылар зур кызыксыну белән  психолог, яшүсмерләр остазы Райнур Газизовның "Хезмәт тәрбиясе", гаилә психологы Гөлзар Вәлиеваның "Беренче урында үзең!", табиб, гастроэнтеролог Алинә Хәсәншинаның чыгышларын, Казанның Шамил мәчете имам хатыйбы Мәхмүт хәзрәт Шәрәфетдиннең "Бәхетнең биш шарты"  вәгазен тыңлаганнар. 

Оештыручылар, чарага килгән әниләрне зурлап, бүләкләр дә әзерләгәннәр.