Бүген авыл җирлекләре башлыклары съездда катнашты

Бүген Казанның "Корстон" күңел ачу комплексында ТР муниципаль берәмлекләр Советының XII съезды узды.

946 муниципаль берәмлек вәкилләре җыелган съезд эшендә Татарстан Президенты Рөстәм Миңнеханов та катнашты.

Безнең районннан әлеге чарага район башлыгы урынбасары Ришат Нурисламов җитәкчелегендә барлык авыл җирлекләре башлыклары, Әгерҗенең "Кировское" ТОСы җитәкчесе Клара Безбородова һәм Биектаудан "Иң яхшы шәхси ярдәмчел хуҗалык" республика бәйгесе җиңүчесе Владимир Мухачев бардылар.

Съездда ассоциациянең яңа рәисе сайланды. Ул - дәүләт эшендә зур тәҗрибәгә ия Әгъзам Гобәйдуллин.

Моңа кадәр Татарстан муниципаль берәмлекләр Советы рәисе вазифасын башкарган Минсәгыйть Шакиров үз теләге белән вакытыннан алда вазифасыннан азат ителде.