Бүген – Су асты көймәсендә хезмәт итүчеләр көне

Үзе дә диңгезче булып хезмәт иткән, күп еллар районда Хәрби-диңгез флоты ветераннары оешмасы рәисе булган Раиф Гәрәев бәйрәмнәре уңаеннан музей хезмәткәрләре белән берлектә төрле елларда Төньяк флотта су асты көймәсендә хезмәт иткән диңгезчеләрне җыйды.

Анда Әгерҗедән Ринас Нуруллин, Илнар Закиров, Тирсәдән Айдар Насыйфуллин катнаштылар. Диңгезчеләр Иж-Бубый мәктәбе укучыларына су асты көймәсендә хезмәт итү шартлары, әлеге көймәләрнең төзелеше, аларда нинди вазифалар башкарып булганлыгы турында сөйләделәр.

Диңгезчеләрне бәйрәмнәре белән район хәрби комиссары Илгиз Галиев котлады, үсеп килүче буынга тхәрби-патриотик тәрбия бирүдә ярдәмнәре өчен рәхмәтен белдерде. Музей хезмәткәрләре кунакларга истәлек бүләкләре тапшырдылар.