Чечняда контртеррорчылык операциясе башлануга – егерме җиде ел

Чара 2нче шәһәр мәктәбендә башланды. Әлеге мәктәптә укыган Илдар Тукаевның гомере 1996 елда Чечняда барган бәрелешләр вакытында өзелә. Быел аңа 44 яшь тулган булыр иде.

– Искә алмаган бер генә көнебез дә юк балакаебызны. 25 ел буе йөрәктә ут, – диде Илдарның әнисе Тәнзилә апа.

2нче мәктәп коллективы тарафыннан әзерләнгән тантаналы чарада район башлыгы Азат Вәлиев, район хәрби комиссары Илгиз Галиев, “Хәрби туганлык“ оешмасы рәисе урынбасары Рафаэль Садыйков катнаштылар.

– Чечнядагы канкойгыч вакыйгалар ерак үткәндә калса да, ул көннәр кайтавазы әле дә яши. Безнең районнан армиягә алынган солдатлар, район эчке эшләр һәм полициянең линия бүлегеннән – барлыгы 286 ир-егет Чечняда Ватан алдындагы бурычын үтәде.

Ни кызганыч, өчесе – Әгерҗедән Илдар Тукаев, Яңа Акхуҗадан Айрат Шабаев, Кырындыдан Рушан Фатыйховның гомерләре чит җирләрдә өзелде, – диде район башлыгы Азат Вәлиев.

Алар батыр якташыбыз хөрмәтенә ясалган “Мин кайтырмын, әмма сүзләрдә һәм эшләрдә“ дигән хәрби стенд янына чәчәкләр салдылар.

Чара яңа мемориаль комплекста дәвам итте.

– Әлеге искә алу чарасында ел саен Яңа Акхуҗадан киләбез. Улыбыз Айратны югалтканга быел 22 ел. Шушы ир-егетләргә карагач, газиз балам искә төшә, – диде Айсинә апа.

– Чынлап та, бу көн улларын югалткан әти-әниләр, утын-суны кичкән ир-егетләр өчен дә бик әһәмиятле. Мондый дәһшәтле вакыйгалар кабатланмасын иде, – диделәр хәрби комиссар Илгиз Галиев һәм “Хәрби туганлык“ оешмасы җитәкчесе Рафис Муллахмәтов.

Мәрхүмнәрне бер минут тынлык белән искә алганнан соң, җитәкчеләр, 2нче мәктәпнең яшь армиячеләре, Чечняда хәрби бурычларын үтәгән ир-егетләр мемориаль ташка чәчәкләр салдылар.

Кичә Рафаэль Садыйков җитәкчелегендәге делегация Чечняда гомерләре өзелгән егетләрнең каберләрендә булдылар, аларның әти-әниләре белән очраштылар.

Әлеге чараны оештыруда зур тырышлык куйганы өчен Рафаэль Садыйковка олы рәхмәт сүзләре дә яңгырады.