Әгерҗе – томан эчендә

Менә инде ничә көннәр рәттән Әгерҗедә һәм тирә-як авылларда ниндидер томан күзәтелә. Ул бик күпләрдә бераз шик һәм шөһбә уята. Күрше-тирә төбәкләр дә шундый ук "томан" эчендә. Синоптиклар әйтүенчә, бу томан түгел, ә янгыннар нәтиҗәсе. Бүген Ханты-Мансийск һәм Ямал-Ненец автономияле округларында, Коми республикасында янгыннар аркасында катлаулы хәл саклана. Әлеге төбәкләрдәге һава тирә-якка меңнәрчә чакрымнарга тарала. Мондый томан яңгырдан соң гына юкка чыгачак, диләр белгечләр. Ә яңгырларга килгәндә, якын көннәрдә Әгерҗедә явым-төшем көтелми. Ял көннәрендә кызу һава торышы сакланачак.