Әгерҗедә ветераннарга хезмәт күрсәтәләр

• Исеменнән үк күренгәнчә, әлеге атналык барышында без үзебездә исәптә торучы ветераннарга карата яхшы гамәлләр башкарабыз. Бу ветераннарның өйләрен җыештыру, бакчаларын, ишегалларын тәртипкә китерү кебек игелекле эшләрдән гыйбарәт, – ди үзәк җитәкчесе Ольга Еремина. – Яхшы гамәлләр атналыгыннан бер генә хезмәткәребез дә читтә калмый.

Үзәкнең гаиләгә һәм балаларга ярдәм күрсәтү бүлекчәсенә йөрүче малай-кызлар әлеге өлкәннәрне үз куллары белән ясаган бүләкләрне тапшырып та сөендергәннәр.   

Атналык барышында авылларда гомер кичерүче ветераннар да игътибардан читтә калмаган.

• Барлык авыл җирлекләрендә социаль хезмәткәрләр өлкәннәребезне чәй табыны артына дәштеләр. Һәркайсына җыештыру эшләрендә дә булыштылар, – ди Ольга Николаевна.

Менә шулай, исеме җисеменә тәңгәл булып, атналык өлкәннәргә карата яхшы гамәлләр башкарып узган. Моның өчен алардан күпме рәхмәт сүзләре ишеткәннәрдер акциягә кушылучылар.

• Яхшы гамәлләр атналыгын киләчәктә традициягә кертергә уйлыйбыз, – ди Ольга Еремина.

Дания АБЗАЛИЕВА.