Хәзер сыер асрау отышлымы?

Хәзер күпләр сыер асраудан баш тарта. Моны кемдер файдасы юк дип аңлата. Кемдер озаграк йоклауны өстен күрә. Без әлеге сорауны озак еллар сыер тотучы хуҗабикәләрнең үзләренә биреп, аларның фикерен белдек.

Зинаида КАЗАНЦЕВА, Барҗы-Пельга авылы:

- Сыер тоту ничек отышлы булмасын инде?! Безнең авылда өч-дүрт гаилә быел сыерын сатты. Аларга бер дә җиңел булмас дип уйлыйм. Ярый ла, шәһәрдә эш бар. Авылда эш табу бик авыр бит.

Төп эшем булса да, сыерсыз яшәүне мин күз алдына да китермим. "Сыерлы кеше - сыйлы кеше" дип юкка гына әйтмәгәннәр. Беренчедән, аның бозавы була. Сөт сатып та яхшы гына акча эшлибез. Безнең әлегә ике сыерыбыз бар. Аларга терлек азыгы әзерләү белән бернинди проблема булмады. Үзебезнең трактор, тырма бар. Дөрес, быел печән чаба һәм кысу өчен кеше ялларга туры килде. 73 рулон печән әзерләдек. Бу эшләргә 11-12 мең сум тирәсе акча китте. Бер ай эчендә сөт акчасы белән әлеге чыгымнар кире әйләнеп кайтты. Фуражга да шуның кадәр күп акча китә димәс идем.

"Сыер тоту отышлы түгел" дигән сүзне ялкаулар гына әйтә аладыр. Элек үз техникабыз булмаганда да бер сыер булса да тоттык. Төнге сәгать өчтә торып печән җыярга чыккан чаклар булды булуын. Тик үзебез өчен тырыштык бит.

Без Удмуртиянең Әлнәш районы белән күрше булып яшибез. Алар безнең көтүлекләргә кызыгалар. Бездә мал йөртер урын юк, ә сездә, әнә, нинди иркенлек, диләр.

Авылыбызда терлек асраучы яшь гаиләләрнең булуына бик сөенәм мин. Кайберәүләр хәтта үзләре генә дә мал асраудан курыкмыйлар. Әйтик, Елена Лазарева, Валентина Любимова өлкән яшьтәге әниләрен тәрбиялиләр. Төп эшләренә дә җитешәләр, мал да тоталар.

Сәламәтлек барында, гаилә имин булганда, Хөкүмәт ярдәм итеп торганда, сөтне өй каршыннан ук алып киткәндә сыердан баш тартмыйбыз әле.

Эльмира ҖӘЛӘЛОВА, Тирсә авылы:

- Тирсәгә килен булып төшкәнемә 25 ел, менә шуннан бирле бер көн дә сыерсыз яшәгәнебез юк. Мин аны күз алдына да китерә алмыйм. Бер генә сыер тотуның алай файдасы юктыр дип уйлыйм. Шәхсән безгә килгәндә, икедән дә киметкәнебез булмады. Шунысын да әйтеп куйыйм әле: сыер саву, сөтне эшкәртү кебек эшләрне бик яратып, һич тә авырсынмыйча сөенә-сөенә башкарам. Аппаратыбыз булса да, сыерларны кул белән савам. Миңа шулай ныграк ошый.

Сөт һәм сөт ризыкларын сату өчен ирем Фәрит белән атнага бер тапкыр Әгерҗегә олы базарга йөрибез. Егермешәр кило эремчек, унбишәр шешә сөт, сөтөсте, май, корт сатып кайтабыз. Үзебезнең сатып алучыларыбыз да бар, алар килүебезне көтеп кенә торалар. Атна башында мин, гадәттә, май язам. Ә базарга барыр алдыннан сөтөсте аертам, эремчек ясыйм. Ризык свежий булсынга эшләнә инде болары. Сөт күп чорда көн саен сепаратордан аертырга туры килә. Кышын ике көнгә бер тапкыр аертабыз. Яшермим: җәен кайчак кайбер сөт ризыкларын кире алып кайткан вакытлар да була. Аның каравы, кышын бик тиз алып бетерәләр. Йөри торгач, һәр нәрсәгә җайлашып бетәсең икән ул, кайсы сатып алучыга ни ошамаганын яттан беләбез инде хәзер.

Бозауларны да үстереп, суеп сатабыз. Озын сүзнең кыскасы, сыерлар безне тук та яшәтә, акчалы да итә. Бүгенге көндә төп керемебез шуннан булганлыктан, малкайларыбыз исән-сау гына булсын дип телибез.

Менә быел да кышка тыныч күңел белән керәбез, шөкер. Малларга җитәрлек печән әзерләдек. Ул ягын Фәрит хәстәрләде. Киләчәктә дә шулай тигез булып, абзар тутырып маллар асрарга язсын иде.

Белешмә:

2017 елның 1 июленә Әгерҗе районында 1996 сыер исәпләнә. Узган ел әлеге сан 2087 булган.