Көзнең әле гүзәл чагы

Көне буе яңгыр койды,

Күңелдә - сүз яңгыры.
"Язам!" дисәң, җай табыла
Рәхмәтләр яугыры!

Күз карашы - чәчәкләрдә,
Иркәләнә, назлана.
Көзнең әле гүзәл чагы,
Әйтерсең лә, кыз бала.

Бит алмасы алсулыгы
Август алмаларында...
Саф иреннәр кызыллыгы
Миләш, баланнарында...

Ап-ак казлар - инешләрдә,
Күктә - торна тавышы...
Казлар китү, саубуллашу
Бу да - кызлар язмышы...

Басу түрендә көлтәләр
Чәчләр күк толым-толым.
Җитү кызга охшатам мин
Өлгергән иген кырын.

Күк йөзен томалап алып
Яңгырның койган мәле...
Болыт читен күтәрдем дә
Күзәттем көзнең ямен.

Әлфирә НИЗАМОВА.

Исәнбай авылы.