Районда язгы өмәләр старт алды

Синоптиклар фаразлавынча, безнең төбәккә кызу темплар белән тотрыклы җылы килә.

–    Көннәр ныклап җылытуга, шәһәрне чистарту буенча масштаблы эшләр башланып китте. Эшмәкәрләргә, шәхси йорт хуҗаларына мөрәҗәгать итәсе килә. Илебез өчен бик тә әһәмиятле булган елда, Бөек Җиңүнең юбилей язын каршы алганда йортларның, оешма-учреждениеләрнең тышкы якларына, керү уңаена игътибар итегез. Баннерларны алыштырыгыз, буяуларын яңартыгыз, элмә такталарны тәртипкә китерегез. Чәчәк түтәлләре турында да онытмагыз. Юбилей елындагы җиңү мае, чын-чынлап чәчәк атучы май булырга тиеш, – дип мөрәҗәгать итә Әгерҗе шәһәр башкарма комитеты җитәкчесе Илнар Гыйззәтуллин. 

Икеайлык кысаларында админстратив комиссия эшчәнлегенә дә аерым игътибар биреләчәк. Район җитәкчелеге санкцияләнмәгән чүплекләрне һәм тулаем алганда шәһәр һәм авылларны тәртипкә китерү кагыйдәләрен бозучыларны ачыклау буенча эшне активлаштырырга чакырды. 

–    Административ комиссия әгъзалары административ хокук бозулар буенча беркетмә төзүгә вәкаләтле вазифаи затлар белән берлектә атна саен рейдларга чыгачак. Тәртип бозу очраклары булганда гаепле затлар административ җаваплылыкка тартылачак, – дип кисәтә административ комиссия рәисе, район башкарма комитеты җитәкчесе Илгиз Салихов. 

Райондашлар хәлне штрафка кадәр җиткермәсләр дип ышанасы килә. Тирә-якның чисталыгы иң элек хуҗаларның үзләренә рухи канәгатьлек хисе алып килә бит. 

Белешмә:

Җирлек территорияләрен тәртиптә тоту кагыйдәләрен бозган өчен кисәтү яки административ штраф каралган:

гражданнар өчен – 2-3,5 мең сум;
вазифаи затларга – 15-30 мең сум;
юридик затларга – 200-500 мең сум.

Ел дәвамында тәртип бозу очраклары кабатланганда штраф күләме түбәндәгечә:

гражданнар өчен – 3,5-5 мең сум;
вазифаи затларга – 30-50 мең сум;
юридик затларга – 500 мең сумнан алып 1 миллион сумга кадәр.