Тәбәрледә халык җыены узды

Тәбәрледә халык җыены район башкарма комитеты җитәкчесе Илгиз Салихов, оешма-учреждение җитәкчеләре һәм вәкилләре катнашында үтте. Җирлек башлыгы Рафил Сәлимуллин халык тырышлыгы һәм игелек ияләре ярдәме белән башкарылган эшләргә, җирлектәге күркәм традицияләргә аерым тукталды.

Аларның кайберләре:

• Авылларны, зиратларны тәртиптә тотуда халыкның ярдәме зур. Зиратларда узучы өмәләрдә читтә яшәүче авылдашлары да актив катнашалар.

• Юбиляр авылдашларын котлау традициясе яши. Авыл хуҗалыгы тармагында хезмәт куйган юбилярларга ТР Авыл хуҗалыгы һәм азык-төлек министрлыгының Рәхмәт хатлары тапшырыла.

• Махсус хәрби операциядә катнашучылар белән бергә аларның гаиләләренә дә ярдәм күрсәтелә.

• Бөек Җиңүнең 80 еллыгы уңаеннан авыл җирлеге территориясендәге һәйкәлләр зур йөрәкле авылдашлары, иганәчеләр ярдәме белән заманча итеп яңартылган.

• Тәбәрле мәчетенә газ кертү өчен авыл халкы ярдәме белән котельный төзелгән.

• Игелекле фермер Алнур Азиев булышлыгы белән галим якташлары Раиф Мәрданов авторлыгында “Тәбәрле тарихына өстәмәләр” китабы дөнья күргән.

• Тәбәрле, Сокман, Яңа Акхуҗа мәчетләренең җир, бина документларын рәсмиләштерү эшләре башкарылган.

• “РИТЭК” җәмгыятенең социаль һәм мәдәни проектлар бәйгесендә катнашып җиңү яулаганнар һәм “Яшә, чишмә!” проектын тормышка ашыруга грант отканнар.

• Һәр елдагыча, авыллар Яңа елны зур әзерлек белән каршы алганнар: учреждение, шәхси хуҗалыклар территорияләре кар сыннары, төрле утлар белән бизәлгән.

Җыен да халыкның активлыгы белән узды.