Татарстан юлларында 6 бала һәлак булган

Татарстанда “Көзге каникул” профилактик чарасы дәвам итә. Ул балалар белән бәйле юл-транспорт һәлакәтләрен кисәтүгә юнәлтелгән. 
Республикада балаларны транспорт чарасында йөртү белән бәйле хәл аеруча борчу тудыра. Чөнки ел башыннан Татарстан юлларында кече яшьтәге 6 пассажир һәлак булган. 

–    Хәл катлаулану сәбәпле, балалар күп булган урыннарда аларны йөртү кагыйдәләрен бозуны кисәтүгә кагылышлы чаралар уздырыла, – ди ЮХИДИ бүлекчәсе начальнигы вазифаларын башкаручы Финәрис Бәшәров. – Кече яшьтәге җәяүлеләр дә безнең игътибардан читтә калмый. Алар тарафыннан юл кагыйдәләрен бозу фактлары дәүләт автоинспекциясе хезмәткәрләре, юл хәрәкәтенең яшь инспекторлары отрядлары, педагоглар, Россия укучылар хәрәкәте активистлары белән бергәләп ачыклана. Инспекторлар шулай ук укучылар һәм аларның әти-әниләре белән әңгәмәләр коралар. 

Моннан тыш, Финәрис Бәшәров, көннәрнең кыскара баруы сәбәпле, урамнар яктыртылган очракта да караңгы вакытта юлны аркылы чыгучы җәяүлене күреп алу кыен булуын кисәтеп, утны кире кайтаручы элементларның әһәмияте турында искәртә. 

Белешмә:

Агымдагы елның 9 аенда республика юлларында 16 яшькә кадәрге балалар катнашында 331 юл-транспорт һәлакәте теркәлгән. 11 бала һәлак булган, 348е төрле тән җәрәхәтләре алган.