Яңа бәйге: “Һай, әни, үсәбез“

Әниләр көне уңаеннан "Әгерҗе хәбәрләре" газетасы сайтында "Һай, әни, үсәбез" дип аталган яңа бәйге игълан ителә.

Һәркемнең гаилә киштәсендә балачак фотоларын, иң күңелле мизгелләрне туплаган альбомы бар. Гадәттә, әлеге фотоларда беренче адымнар да, яраткан уенчыклар да, якын кешеләр белән матур мизгелләр дә чагылыш таба.

Безнең фотолар бәйгесе нәкъ менә элеккеге һәм хәзерге фоторәсемнәр белән бәйле булачак. Альбомны ачып, әниегез белән бергә төшкән иң матур фотоны табыгыз да шушы ук мизгелне хәзер кабатлап, фотога төшереп алыгыз. Ягъни ике фотода бер үк кешеләр була, бары тик еллары гына төрлечә: элек һәм хәзер.

Ике фотоны да (элеккесен һәм хәзергесен) безнең agr-vesti@mail.ru электрон почтага юллагыз йә редакциягә кертеп чыгыгыз (К.Маркс урамы, 8). Фотолар 20 ноябрьгә кадәр кабул ителә. 21-25 ноябрьдә сайтта тавыш бирү узачак. Җиңүчене 26 ноябрьдә - Әниләр көнендә игълан итәбез.

Фотоларга кыскача аңлатма язарга да онытмагыз. Аларда фотода кемнәр икәнлеген, аларның кайдан булуын күрсәтегез. Җиңүчене редакциянең истәлек бүләге көтә.