Рөстәм Миңнеханов тәкъдиме белән «Күрше фест» халык конкурсына старт бирелде

Татарстан Республикасы Рәисе Рөстәм Миңнеханов «Күрше фест» ишегалды вакыйгалары халык конкурсына старт бирде. Конкурс нәтиҗәсендә Татарстан халкы республика ишегалларында чаралар оештыру өчен 500 мең сумга кадәр акча ала ала.

«Күрше фест» конкурсы «Безнең ишегалды» программасының дәвамы булды һәм ил масштабында моңарчы күрелмәгән. «Күрше фест» халык конкурсы халык арасында күршелек культурасын үстерүгә, Татарстан ишегалларында гаилә һәм күршелек традицияләрен ныгытуга юнәлдерелгән.

Анда үз ишегалдында кызыклы вакыйгалар үткәрергә теләгән һәм әзер булган оешмалар һәм инициативалы гражданнар да катнаша ала.

Гаризалар 12 майдан 15 июньгә кадәр dvor.tatar/konkurs сайтында кабул ителә. Җиңүчеләрнең исемнәре 1 июльдә үк билгеле була. Җәй дәвамында һәм 30 сентябрьгә кадәр аларга үз ишегалдында чаралар үткәрергә туры киләчәк.

«Безгә республиканың һәр кешесенә диярлек ирештерү мөһим. Шуңа күрә без бу конкурсны чын-чынлап халыкчан итәргә ниятлибез, ә конкурска гаризаларны һәм вакыйгаларны күңелгә ятышлы итеп көтәбез», — диде Татарстан шәһәрләрен үстерү институты директоры, «Күрше фест» конкурсын оештыручы Наилә Зиннәтуллина.

Чыганак