Әгерҗе әбунәчеләре бүләк алды

"Татмедиа" җәмгыятенең үз укучылары арасында уздырган "Язылган өчен телевизор" бәйгесендә өч газета укучыбызның бүләк отуын хәбәр иткән идек инде.

Узган атнада әлеге бүләкләрне ияләренә тапшырдык. Барҗы-Умгадан Әлфия Шәймөхәммәтова белән Девәтернәдән Расим Шакирянов Кукмара табалары җыелмасы, Яңа Бәзәкәдән Гөлназ Вәлиева махсус бүләккә ия булдылар. Сүз уңаеннан: Әлфия һәм Гөлназ ханымнарның әлеге бәйгедә беренче тапкыр гына бүләк алулары түгел инде. Актив әбунәчеләребезне котлыйбыз һәм алга таба да җиңүләр телибез.

Ә менә Расим Шакиряновның мондый акциядә үзен беренче тапкыр гына сынавы.

- Мин елның-елында кимендә өч газета-журналга язылам. Ә бу юлы квитанцияләремне "Татмедиа" бәйгесенә дә юллап карарга булдым һәм оттырмадым. Мондый чара киләсе яртыеллыкта оештырылса, анысында да, һичшиксез, катнашачакмын, - ди ул.

Расим әфәнде үрнәгендә сез дә үз бәхетегезне сынап карагыз, хөрмәтле укучыларыбыз. Ә без "Татмедиа" тарафыннан уздырылучы мондый акцияләр турында сезгә газетабыз аша хәбәр итеп торырбыз.

Районыбызга кагылышлы яңалыклар белән безнең  Telegram-каналдан танышыгыз