Әгерҗелеләр Раштуаны каршы алырга әзер

5 гыйнвар көнне район үзәк китапханәсендә Раштуа бәйрәме уңаеннан бәйрәм чарасы үткәрелде.

Анда китапханәнең актив укучылары катнашты. Китапханә хезмәткәрләре, әкияти персонажлар булып киенеп, тамашачыларга татар һәм рус телләрендә искиткеч тамаша бүләк иттеләр. Матур Кыш бабай да, Кар кызы да, күңелле Убырлы карчык та, сөйкемле җәнлекләр дә, шул исәптән яшь үгез дә, бик тырыштылар.

Өлкәннәр һәм балалар бик теләп табышмакларга җавап бирделәр, ребуслар чиштеләр, Кыш бабай биремнәрен бик теләп башкардылар. Кемдер шигырьләр сөйләде, кемдер җырлады, кемдер биюгә бик теләп кереште.

Шунысы куанычлы, яшь буын вәкилләре өлкәннәрдән бернәрсә белән дә калышмыйлар. Алар шигырьләр укыйлар, табышмаклар чишәләр, беренче юллардан ук танып балалар өчен әсәрләренең исемнәрен әйтә беләләр. Кыскасы, китап сөючеләрнең лаеклы алмашы үсә.

Үзәкләштерелгән китапханәләр системасы директоры Эльмира Капилова бәйрәмдә катнашучыларны Яңа ел һәм Раштуа бәйрәме белән котлады. Иң изге теләкләрен Кыш бабай да җиткерде. Күңелле чара барлык катнашучыларны күтәренке кәеф һәм позитив белән рухландырды.

Районыбызга кагылышлы яңалыклар белән безнең  Telegram-каналдан танышыгыз