Әгерҗенең хезмәт коллективлары “Яңа ел фантазияләре“ тамашасына әзерләнә

Быел Яңа ел алдыннан Мәдәният сараенда тәүге тапкыр районның хезмәт коллективлары тарафыннан әзерләнгән "Яңа ел фантазияләре" дип аталган шоу-тамаша күрсәтеләчәк.

- Әлеге тамашада чыгыш ясар өчен һәр коллективка Яңа ел темасын чагылдырган ун минутлык чыгыш әзерләргә кирәк. Аны иҗади яктан уйлап, исеменә туры китереп, ягъни бар фантазияне эшкә җигеп әзерләү зарур, - ди үзәкләштерелгән клублар системасы директоры Эльвира Нәбиева.

Тимерьюлчылар, район үзәк хастаханәсе, яшьләр бүлеге, шәһәр Мәдәният йорты коллективлары әлеге концертта катнашырга теләк белдергән инде. Заявкалар җыю әле дә дәвам итә. Тулырак мәгълүмат алу өчен 22835 телефонына шалтырата аласыз. Катнашу турындагы заявкаларны okagrys@yandex.ru электрон адресына да юлларга була.

Сайлап алу туры район Мәдәният сараенда 19 декабрьдә узачак. Ә концерт-тамаша 28 декабрьдә 17 сәгатькә билгеләнгән.