«Язгы кәеф” бәйрәмендә күңел ачтылар

Нарат авылында клуб булмаса да, төшенкелеккә бирелмиләр, бәйрәмнәрне урамда уздыралар. “Язгы кәеф” бәйрәменә дә халык бердәм булып җыелды. 

Иртүк учак ягып казан астылар. Анда аш-су остасы Гөлчәчәк Хуҗина тәмле ботка пешерде, хуш исле үлән чәе кайнатты. Люция Гайсина  авылдашларын шашлык белән сыйлады. Уңган-булган ханымнар Әлфия Шәмсетдинова, Гүзәлия Җәләева, Мәрдия Гыйззәтуллина, Рәфисә Салихова тәмледән-тәмле камыр ризыклары пешереп алып чыктылар. Саф һавада мул табын кордылар.

Бәйрәмне авылдашлары Рәфисә Салихова, Нурия Нәбиуллина җыр-биюләре белән бизәделәр. Девятернядан Фәнис–Алия Арслановлар, Люция Гайсина, Гөлнур Сафиуллина һәм аның кызлары Гөлнара, Гөлфия, Гөлия матур җырларын бүләк иттеләр. Фәнис уйнаган көйләргә олысы-кечсе рәхәтләнеп җырлап, биеп күңел ачты. 

Чынлап та, бәйрәм һәркемгә язгы кәеф бүләк итте.