Вадим Захаров күпбалалы әти булды: «Без алдан кычкырып йөрмәскә булдык»

Вадим Захаровның өченче тапкыр әти булуы турында хәбәр иткән идек. «Интертат» җырчыны күпбалалы әти булуы белән котлады.

- Вадим, хәзер бит инде бәбигә узу белән хәбәр итәләр, гендер-патилар уздыралар. Сезнең гаиләдә бәби туачагын белми дә калдык.

Без алай алдан кычкырып йөрмәскә булдык. Кычкырып йөрисе дә килмәде. Ларисаның да андый гадәте юк, гаиләдәгене читкә чыгармый.

- Тормыш иптәшегезнең йөклелек чоры ничек узды?

Әйбәттер дип беләм инде. Минем кайтып кергән булмагач (рәхәтләнеп көлә).

- Бәби туганда кайда идегез?

Хатыным бәби тудыру йортына киткәндә, Башкортстан якларында гастрольләрдә идем әле. Бәби тууына Казанга кайтып өлгердем.

- Гастрольләр графигын махсус көйләдегезме әллә?

Юк, шулай кайткан чорга туры килде. Лариса 2 көн алдан барып яткан иде.

- Бәби тууын ишеткәч, хис-кичерешләрегез нинди булды?

Әй, белмим дә нинди. Аңлап бетереп булмый. Әле кайтмаган бит, кулга алмаган бәбине.

- Иң беренче сөенечне кемнән алдыгыз?

Кечкенә кызыбыз белән янәшә идек, аңа әйттем. Кызлар икесе дә көттте инде сеңелләрен. Аеруча да кечкенәсе көтте, апа буласы килде. Бик сөенделәр.

- Ике кыздан соң, малай көткән идегезме?

Юк, малай кирәк, дигән теләк булмады. Мин кызлар әтисе булырга ияләшкән инде.

- Рәхмәт, сау-сәламәт сабый булсын, Вадим. Тигезлектә үстерегез.