1нче гимназиядә «Тел кешене дус итә» дип исемләнгән шәһәр фестивале узды

Туган телләр һәм Халыклар бердәмлеге елы кысаларында 1нче гимназиядә «Тел кешене дус итә» дип исемләнгән шәһәр фестивале узды.

Конкурста мәгариф идарәсе вәкилләре, ветеран педагоглар, шәһәр мәктәпләре укучылары, шулай ук татар теле һәм әдәбияты укытучылары катнашты. Чарада безнең район территориясендә яшәүче халыкларның бай мәдәнияте, гореф-гадәтләре һәм фольклоры тәкъдим ителде.

Гимназия командасы мариларның гореф-гадәтләре турында сөйләде, 2 нче мәктәп татарларны тәкъдим итте, 3 нче мәктәп укучылары рус халкының үзенчәлеген күрсәтте, ә 4 нче мәктәптән килгән катнашучылар удмуртлар турында сөйләде.

Шулай ук чара төрле халыкларның җырларын, биюләрен, милли ризыкларын һәм костюмнарын тәкъдим итү презентациясен үз эченә алган иде.

Катнашучыларны сәламләп, мәгариф идарәсе башлыгы Вәсилә Сафиуллина бу чара – чын бәйрәм, анда без халыкларның милли һәм мәдәни кыйммәтләренең байлыгын һәм төрлелеген ачык күрәбез, дип билгеләп үтте.

Фестиваль катнашучыларны бүләкләү һәм уртак флешмоб белән тәмамланды.