Красный борда хәйрия концерты узды  

Авыл үзешчәннәре әлеге концертны Красный борда төзелүче чиркәүгә ярдәм йөзеннән оештырдылар. Хәйрия концертында “Наз” приюты, “Теремкәй” балалар бакчасы, Красный бор мәктәбе, участок хастаханәсе, “Сударушки” һәм “Камский балаган” иҗат коллективлары, Мәдәният йорты, элемтә бүлекчәсе, авыл җирлеге Советы хезмәткәрләре катнаштылар. Һәр учреждение матур чыгышларын бүләк итте. Сәхнәдә берсеннән-берсе  матур, моңлы җырлар, шигырьләр яңгырады. Сәхнәләштерелгән күренешләр, биюләр көчле алкышларга күмелде.

Чиркәүне төзекләндерү өчен 17 100 сум акча җыелды. Красный бор авыл җирлеге башлыгы Анатолий  Лазарев үзешчәннәргә җылы рәхмәт сүзләрен белдерде. Тамашачы артистларны аягүрә басып көчле алкышларга күмде.

Раилә Тимофеева.

Ямурза авылы.