Барҗы-Умга, Барҗы-Пельгадан – чираттагы гуманитар ярдәм

Алар 2022 елдан башлап ил иминлеге сагында торучы егетләргә һәрьяклап ярдәм күрсәтәләр.

– Бүген иртүк “Дельфин” позывнойлы якташыбыз аша хәрбиләргә капчык-капчык әйбер озаттык, – ди Барҗы-Умганың “Изге йөрәкләр” волонтерлык берләшмәсе җитәкчесе Рамилә Хикмәтуллина.

Бу юлы алар:

• маскировка челтәрләре,
• чәкчәк,
• суган, сарымсак, кәбестә, кишер-чөгендер һәм башка яшелчәләр,
• тозлаган кыяр-помидорлар,
• киптерелгән үлән чәйләре,
• башка төрле азык-төлек, кием-салым биреп җибәргәннәр.

– Егетләребез өй ризыкларын көтеп алалар. Шуңа үз кулларыбыз белән үстергән, ясалган, пешерелгән ризыкларны җибәрергә тырышабыз, – ди Рамилә Зөфәр кызы.

– Хәрбиләрне “исән-сау кайтыгыз, сезне җиңү белән көтәбез”, дип кочаклап озатып калдык, – диделәр волонтерлар.