Ямурзадан Эльвина Исмәгыйлева "Татар кызы" бәйгесендә катнашкан
Кечкенәдән сәхнәдә җырлап-биеп үскән кыз
Чаллыда “Татар кызы“ республика бәйгесенең зона туры узды.
Анда унбер районнан килгән милли җанлы кызлар төрле номинацияләр буенча осталыкларын күрсәттеләр. Безнең район данын Ямурзадан Эльвина ИСМӘГЫЙЛЕВА яклады. Ул Чаллы педагогика университетының икенче курсында укый. Кечкенәдән сәхнәдә җырлап-биеп үскән кыз. Бәйгедә дә жюрига үзе яратып башкара торган бик матур җыр һәм бию бүләк иткән.
– Татар кызлары гомер-гомергә аш-суга оста булганнар бит. Бәйгегә дә бер милли ризык әзерләп алып килергә кирәк иде. Без мич коймагы пешердек. Күпереп пешкән тәмле коймагыбызны бик яраттылар, – ди Эльвинаны бәйгегә әзерләгән Ямурза клубы мөдире Чулпан Хикмәтуллина.
“Татар кызы“нда катнашучылар үзләренең шөгыль-мавыгулары турында да сөйләгәннәр, милли костюмнардан дефиле күрсәткәннәр. Татар теле, мәдәният, тарих һәм гореф-гадәтләргә багышланган интеллектуаль уенда да сыналганнар.
– Мин матурлык, сәләт һәм милли традицияләр бәйгесенең зона этабында катнашуыма чиксез шат. Алдагы турга уза алмасам да, төшенкелеккә бирелмим. Мин бу бәйгедән бик күп файдалы мәгълүмат алдым, – ди Эльвина.
Районыбызның милләт җанлы кызын Бөтендөнья татар хатын-кызларының “Ак калфак“ иҗтимагый оешмасы рәисе Кадрия Идрисова Диплом белән бүләкләгән.
Районыбызга кагылышлы яңалыклар белән безнең Telegram-каналдан танышыгыз
Иң мөһим һәм кызыклы язмаларны Татмедиа Telegram-каналында укыгыз
