Шигъри күчтәнәч: Тик авылда гына

Алкасыман нәни ай эленгән 
Инә очы кадәр йолдызлар... 
Авылның бит хәтта карында да 
Үзенә хас моңлы җыры бар.

Керт-керт басып киез итек белән 
Кар өстеннән тик бер үтәсең. 
Сизәсеңме, шушы үзгә җырның 
Шәһәрләргә ияреп китәсен... 

Ап-ак биек таулар, шугалаклар 
Төшләреңә кереп йөдәтәсен. 
Шәһәр урамында аклык эзләп 
Сагышланып гомер итәчәксең. 

...Ни дисәң дә, тик авылда гына 
Төтеннән дә коймак исе килә... 
Бата-чума атлы чана уза... 
Тәрәз төпләрендә гөлләр көлә... 

“Исәнмесез!” диеп һәр иртәдә 
Иреннәр елмая, күзләр көлә. 
Тик авылда гына кешеләрдән 
Бер-берсенә җылы бөркелә.

Әлфирә НИЗАМОВА.

Исәнбай авылы.