Быел беренче сыйныфка кабул итү яңа кагыйдәләр буенча башкарылачак

Башка елларда беренче сыйныфка кабул итү өчен гаризаларны 1 февральдән тапшырырга мөмкин булса, быел 1 апрельдән генә кабул ителә башлый.

–    ТР Мәгариф министрлыгының приказы (2020 елның 2 сентябре, №458) белән балаларны башлангыч, төп һәм урта белем бирү программалары буенча укыту тәртибе расланды, –  ди мәгариф идарәсенең башлангыч белем бирү буенча методисты Лилия Гәрәева. – Элек булачак беренче сыйныф укучыларының әти-әниләреннән гаризалар 1 февральдән дә соңга калмыйча кабул ителә башласа, хәзер 1 апрельдән генә алына башлый. Бу мәктәпкә беркетелгән территорияләрдә яшәүче һәм беренче сыйныфка кергәндә өстенлек бирелүче (әйтик, бер гаиләдә яшәүче балалар бер белем бирү учреждениесендә белем алырга хокуклы) гаиләләргә кагыла. Гаризалар кабул итү 30 июньдә төгәлләнә. 

Яңа тәртип нигезендә беренче сыйныфка кабул итү турындагы приказ 30 июньнән соң өч эш көне дәвамында чыгарыла. 

Әгәр бала мәктәпкә беркетелгән микрорайонда яшәмәсә, ата-аналар гаризаны 6 июльдән соң бирәләр. Бу очракта документлар буш урыннар беткәнче, әмма 5 сентябрьгә кадәр кабул ителә. 

Әти-әниләр документларны мәктәпкә шәхсән алып килә алалар. Шулай ук почта аша заказлы хат белән (уведомление белән) салырга да була. Белем бирү учреждениесенең электрон почтасына йә сайтына җибәрергә дә мөмкин. Шулай ук дәүләт һәм муниципаль хезмәтләр порталлары аша юлларга да була.