Яшь хоккейчылар «Водоканал» Кубогы өчен хоккей уйныйлар

Әлеге турнир быел бишенче тапкыр уздырыла. Әгерҗедәге хоккей федерациясе президенты, «Водоканал» ширкәте җитәкчесе Илдус Шәймөхәммәтов, яшь спортчыларны сәламләп, аларга уңышлар теләде. 
–  Әлеге хоккей ярышларын уздыру матур традициягә әйләнде. Киләчәчктә дә без сезне Әгерҗебездә узачак турнирларда күрергә телибез, –  диде ул. 
Иң беренче боз өстендә Әгерҗе һәм Свердлау командалары очрашы. Беренче периодта исәп 1:1 булды. Икенче периодта командалар исәпне үзгәртә алмадылар. Ә менә соңгы период хәлиткеч булды. Әгерҗе командасы, бер-бер артлы ике алка керткәннән соң, Свердлау командасы да бер алка кертте. Нәтиҗәдә, уен әгерҗелеләр файдасына 3:2 белән төгәлләнде. 
Хәзерге вакытта Боз сараенда уеннар дәвам итә. Кичке сәгать 6да ябылу тантанасы, бүләкләүләр булачак.