Ижевск шәһәрендә ташландык йортта бер малай табылган. Ул яраланган булган. Соңрак ачыкланганча, малай иптәшләре белән уйнаганда яраланган. Хәзерге вакытта бала хастаханәдә дәвалана. Бу турыда Россия Тикшерү комитетының Удмуртия Республикасы буенча Тикшерү идарәсенең матбугат хезмәте хәбәр итте.

11 яшьлек малай югалу турында әти-әнисе 6 гыйнварда полициягә хәбәр итә. Бала әбисендә кунакта була. Ул урамга уйнарга чыгып китә һәм әйләнеп кайтмый.

Тикшерүчеләр ачыклаганча, 6 гыйнварда 17 сәгатьтә бала иптәшләре белән бергә төзелеп бетмәгән күп катлы йорт подъездына керә. Йорт Ижевск шәһәренең Лев Толстой урамында урнашкан. Малайлар алтынчы катка күтәрелә һәм пиротехника шартлата башлый. Балаларны олы кеше күреп ала һәм кычкыра. Шул тавышны ишеткәч, малайлар качып китә. Аларның берсе лифт шахтасына таба йөгерә һәм алтынчы кат биеклегеннән аска егылып төшә.

Берничә минуттан балалар урамда очраша, бер малай булмавын абайлап алалар, тик аны өенә кайтып киткән дип уйлыйлар.

Югалган баланың ата-анасы полициягә мөрәҗәгать иткәч, тикшерүчеләр бала белән уйнап йөргән яшүсмерләрне таба. Алар вакыйга булган урынны карый, гадәттән тыш хәл вакытында бу малай белән булган балаларны, аларның ата-аналарын сораштыралар.

Шуннан соң кичке уннар тирәсендә лифт шахтасында яткан малай табыла. Аңа табиблар ярдәм иткән, хәзер аның гомере өчен куркыныч юк.

Фаҗига булган подъезд инде күптәннән ташландык булып тора. Әлеге объектны төзүче компания банкротлыкка чыккан, аның җитәкчесе хөкем ителгән. Бала егылып төшкәннән соң, кешеләр гомере өчен куркыныч яный торган объект тәрәзәләренә рәшәткә куелган, диелә хәбәрдә.

(“Татар-информ“нан алынды).