“Үлемсез полк“ – хәтер сагында
Әнә алар, әтиләре, бабалары, туганнары фотосурәтләрен тотып мәйдан буйлап горур атлаучылар... 9 Май – Җиңү көнендә “Үлемсез полк“ хәрби-патриотик акциясенә кушылган әгерҗелеләр беравыздан “сугышта катнашучыларга дан һәм хөрмәт. Без сезнең батырлыкны онытмыйбыз. Тыныч көннәр, аяз күк йөзе өчен рәхмәт сезгә“ дип кабатлыйлар.
Бәйрәм көнне әлеге акциягә 1500 шәһәрдәшебез катнашты. Тимер юл предприятиеләреннән генә 400гә якын хезмәткәр, якыннарының фотосурәтен тотып, горур атлады. Һәр авыл җирлегендә дә йөзләгән кеше “Үлемсез полк“ акциясенә кушылды. Әгерҗедә узган бәйрәм тантанасында беренче рәттә якыннарының фотосурәтләрен тоткан район башлыгы Валерий Макаров, ТР Дәүләт Советы депутаты Альберт Хәбибуллин һәм башка җитәкчеләр йөзләгән метрга сузылган колоннаны җитәкләделәр.
- Әтием Василий Иванович 1939 елда армиягә алына. Сугыш башлангач, фронтка китә. 1942 елга кадәр сугышның алгы сафларында көрәшә. 1942 елда каты яралана һәм туган якларга кайтырга мәҗбүр була. Әти гомеренең соңгы көннәренә кадәр фронтта күргәннәрен искә алды. Аның кебек тыныч күк йөзе өчен канлы көрәштә үзләрен сынамаган, сәламәтлекләрен югалткан фронтовиклар күпме?! Без аларны онытырга тиеш түгел. 9 Май көнне үзем дә дулкынлану хисләре кичерәм. Ел саен әлеге акциядә катнашам. Ижаудагы улыбыз Дима белән оныгыбыз Антон да бабаларының фотосурәтен тотып чыгалар, – ди шәһәрдәшебез Петр Ионов.
Акциядә балалар бакчаларында тәрбияләнүчеләр, мәктәп укучылары да катнашты. Әнисе Айгөл белән карт бабасы Сафа Әхмәдиевның фотосын тоткан Ралинә Ямиева горурлануын яшермәде.
- Карт бабам 1912 елда туган. Сугышка алынгач танкист булып хезмәт итә. Пленга да эләгә. 1944 елда каты яралана, – ди кечкенә Ралина.
...Бу фотосурәтләрдәге райондашлар безнең күңелләрдә әнә шулай мәңге калырлар. Батырлар – үлемсез...
Миләүшә ЯГЪФӘРОВА.
Следите за самым важным и интересным в Telegram-каналеТатмедиа
Районыбызга кагылышлы яңалыклар белән безнең Telegram-каналдан танышыгыз
Нет комментариев