Сак булыгыз: Әгерҗедә мошенниклар йөри

Янгын сүндерү частена бүген берничә кеше шалтыратып әлеге хәбәрне әйткән. Датчикларны урнаштыру өчен 3 меңнән 6 мең сумга кадәр акча сораганнар. Мошенниклар ялгыз яшәүче өлкәннәрнең ишекләрен шакыйлар икән. Кайбер очракларда СНИЛСларын күрсәтүләрен дә сораганнар. “Әгәр датчиклар урнаштырмасагыз, янгын сүндерүчеләр килеп күп суммада штраф салалар“, дип куркыталар дип сөйләгәннәр шалтыратучылар.

Ышана күрмәгез! Болар барысы да – ялган. Янгын турында кисәтүче автоном приборлар нибары 250 сум тора. Аны һәркем үзе дә куя ала.

• Таныш булмаган кешеләргә ишек-капкаларыгызны ачмагыз, – дип кисәтә Әгерҗе яныгн сүндерү-коткару часте начальнигы Александр Парфенов. – Безнең Хезмәткәрләребез датчиклар кую өчен өйләргә йөрмиләр. Без аларны федераль программа нигезендә бушлай күпбалалы һәм матди яктан аз тәэмин ителгән гаиләләргә генә урнаштырдык.

Әгәр сезгә таныш булмаган кешеләр килә икән, документларын сорагыз, аларның паспорт мәгълүматларын исегездә калдырырга тырышыгыз һәм кичекмәстән 102, 22541 телефоннары буенча полиция бүлегенә яки 101, 24141 номерларын җыеп янгын сүндерү частена шалтыратыгыз.