Мари авылларында яшәүче спорт сөючеләрне салкын көннәр дә куркытмый

Мари авылларында яшәүче спорт сөючеләрне салкын көннәр дә, карсызлык та куркытмый. Алар рәхәтләнеп чаңгыда җилдерәләр. 

–    Җәй көне дә тик торуны белмибез. Ул чакта роликларда чакрым арты чакрымнар узабыз. Ә беренче кар төшүгә чаңгыга басабыз, – ди Азево авыл җирлеге башлыгы Владимир Семенов. 

Үзе көн саен 7-10 чакрым юл уза икән ул. Авылда кичләрен гаиләләре белән чаңгыда җилдерүчеләрнең күп булуы, өлкән буын кешеләренең скандинав таяклары белән йөрүләре сөендерә, ди җитәкче. 

Пеләмеш, Бима, Күләгәш – районда иң көчле чаңгычыларны тәрбияләгән авыллар. 

–    Хәзерге вакытта Күләгәштә – ике, Бимада бер трассада шөгыльләнергә була. Беренче кар төшүгә олысы-кечесе чаңгыда чыкты инде. Көн саен спортчылар гына түгел, авыл халкы да чаңгыга баса, – ди тренер Евгений Яркеев. 

Ул спортчылар белән Татарстан беренчелегенә узачак ярышларга әзерләнгәнлекләрен дә хәбәр итте.

–    Тизрәк күпләп кар явуын көтәбез, – ди Бима авыл җирлеге башлыгы Эдуард Михайлов. – Әлегә тип-тигез урыннарда гына йөрергә мөмкин. Кар аз булганга, күпләр әле чаңгыга басмадылар. Бары чын фанатларның гына күңеле түзми. 

–    Шунысын да әйтергә кирәк, Бима мәктәбен тәмамлап Казанда Идел буе спорт һәм туризм академиясендә укучы Богдан Павлов бу көннәрдә Төмән шәһәрендә Россия беренчелегенә узучы ярышларда район һәм Татарстан данын яклый.