Районда вафат булучылар ике тапкырга күбрәк

Әгерҗе районы ЗАГС бүлегендә 2020 елга йомгак ясадылар. 

Узган ел районда 234 бала туган. Аларның 116сы – малай, 118се – кыз. 64 гаиләдә – беренче, 78 гаиләдә – икенче, 64 гаиләдә – өченче, 26 гаиләдә дүртенче һәм аннан да күбрәк сабый дөньяга килгән. Бер яшь гаиләдә игезәкләр туган. Иң яшь әнигә – 15, иң яшь әтигә 17 яшь. 

ЗАГС бүлегендә 100 парның никахы рәсмиләштерелгән. Иң өлкән кәләшкә – 79, иң өлкән кияүгә 85 яшь. 
90 пар аерылышкан. 

Районда 536 кешенең – 268 ир-ат, шуның кадәр үк хатын-кызның гомере өзелгән. 

Чагыштыру өчен: 2019 елда Әгерҗе районында 241 сабый туган, 449 кеше вафат булган. 148 пар гаилә корган, 118 гаилә таркалган.