Казларның горур мәле

Бу фотоны Тәбәрледә яшәүче газета укучыбыз Раушания Вәлиева җибәрде. Вил–Раушания Вәлиевлар ел саен күпләп каз үстерәләр.

“Казлар иртәдән кичкә кадәр авыл янындагы буада. Моңа кадәр Ходай эт-төлкеләрдән саклады. Үзебезгә язган булсын тырышып үстергән казларыбыз”, – дип язып куйган Раушания апа.

Ә фотога Исәнбайда яшәүче каләм остасы Әлфирә НИЗАМОВА шигырь язды. 

Су өсләре каңгыл-каңгыл,
Казлар алар – көз яме. 
Күрче, йөзеп барышларын, 
Казларның горур мәле.

Көзге судан туймас чагы,
Канатларын ныгыткан...
Ак тәпи аларны күреп
Бар дөньясын оныткан!

Каңгыл-каңгыл килә казлар,
Су өсләре тоташ моң.
Казлар йөзә... ярга түгел, 
Җанга кагыла дулкын...

Каурый-каурый су өсләре, 
Су өсте көзге кеби...
Су буенда шәрә таллар 
Озату җырын көйли...

Илаһи сер табигатьтә, 
Искитәрлек көз яме!
Сокланыплар карар чаклар!
Каурыйларын санар чаклар!
Казларның горур мәле!