Пиннек әзерләргә ярыймы

“Янгын куркынычы саклану сәбәпле, урманнарга пиннек әзерләргә дә керергә ярамый дип ишеткән идем. Бу дөресме?”
Р.ӘХМӘТОВ,
Әгерҗе шәһәре.

Әлеге сорауга Әгерҗе урманчылыгы җитәкче-урманчысы Владимир ИШМУРАТОВ җавап бирә:

–    Әйе, ТР Министрлар Кабинеты карары белән гражданнарның һәм транспорт чараларының урманнарга керүенә кагылышлы чикләүләр тагын 21 көнгә озайтылды. Моннан тыш, урманда учак ягу, янып торган шырпы һәм тәмәке төпчеге ташлау, янгын-майлау материалы сеңдерелгән әйбер ташлап калдыру, үләнгә ут төртү, урманда чүп-чар, пыяла әйберләр калдыру, урманда һәм аның тирәсендә үлән, чүп-чар яндыру тыела. 

Мәҗбүри таләпләрне үтәмәүчеләргә карата штрафлар каралган. Гражданнарга – 1,5-3 мең, вазифаи затларга – 10-20 мең, юридик затларга 50-200 мең сум. 
Бу көннәрдә махсус комиссия урманнарга рейдларга чыгуын дәвам итә.   

Фото: архивтан