Яңа Бәзәкә авылы халкы 12 ел буе юлсызлыктан интегә

Әгерҗе районы Яңа Бәзәкә авылы халкы 12 елдан бирле юлсызлыктан интегә. Яңгыр яуса, куркып торалар, димәк, тагын авылга юл өзелә. Язын да машина белән йөрерлек түгел, балалар мәктәпкә бара алмый, өлкән яшьтәгеләр иписез калган.

— Авылда мәктәп, балалар бакчасы, фельдшер-акушерлык пункты, клуб, кибет тә юк. Күбесе юл булмау сәбәпле ябылды. Күрше авылдан азык-төлек китереп саталар иде, районнан автолавка килеп йөрде. Юл булмагач, алары да юк. Ярый мәчетебез бар. Аны эшләтергә тырышабыз, — ди авылның имамы Фирдәвес Уразмәтов.

Яңа Бәзәкәдә 70 тән артык кеше яши. Авыл халкы бердәм, тату. Үзара салым акчасына урамнарга вак таш җәйдергәннәр. Күмәкләшеп зират, чишмәләрне карап торалар. Авылда 150 баштан артык умарта тотучылар бар. Ике фермер эшли. Тик малыңны суеп, базарга алып барырга уйласаң — юл юк. Олы юлдан Яңа Бәзәкәгә кадәр төзекләндерелергә тиешле ара 4-5 чакрым чамасы. Шул юлга асфальт салдыруны сорап, авыл халкы депутатларга, җитәкчелеккә мөрәҗәгать иткән. Тик вәгъдә ителгәнне уникенче ел көтәләр инде.

Фермерлар авыл хуҗалыгы программалары кысаларында үз биләмәләренә кадәр асфальт юл салдырырга талпынып караган. Тик ул программа да эшләүдән туктаган.
— Кеше саны аз дигән сылтау белән авылда объектлар ябыла. Юллар булмагач, халык тагын да кимеячәк бит. Югыйсә бирегә яшәргә кайтырга теләк белдерүчеләр бар. Унга якын бала күрше авыл мәктәбендә белем ала. Хәзер автобус алып китә алмагач, алар дистанцион укуга күчте. Авылга кунакка кайтучыларны, яңгыр яуса, трактор тарттырып керә. Уңайлы шартлар булмагач, кеше авылдан китә, — дип борчыла Фирдәвес абый.

Ут-күз була калса, берәрсе кисәк авырса да, авылга янгын сүндерү, “Ашыгыч ярдәм” машиналары керә алмый. Ел саен юлларны эттерә-эттерә, хәзер анда кызыл балчык чыккан. Тракторлар да көчкә йөри.

Авыл башлыгы Мәгъсүм Салихов әйтүенчә, узган көз көне үк асфальт салабыз дип вәгъдә иткәннәр. Аннары язга кичектергәннәр.

— Хәзер илдәге вәзгыять белән, белмим, нәрсә булып бетәр? Кеше — эшкә, балалар мәктәпкә бара алмый. Берәр чарасын күрергә кирәк. Бу мәсьәләдә район башлыгы белән элемтәдә торабыз. Вак таш җәйсәләр дә риза, — ди Мәгъсүм Салихов.

Әгерҗе районы башлыгы без шалтыраткан көнне шул мәсьәлә буенча Президентка хат юлларга Казанга киткән иде. Урынбасары Илфат Ямалиев:

— Районның бу юлларга вак таш җәйдерергә акчасы юк. Татарстанның Транспорт һәм юл хуҗалыгы министрлыгында баланс комиссиясе узачак. Анда район башлыгы берничә проблемалы участок, шул исәптән Яңа Бәзәкә турында да җиткерәчәк, видеолар күрсәтәчәк. Нәтиҗә булыр дип өметләнәбез, — диде.

Көтеп карыйк. Яңалыклар белән таныштырып барырбыз.

Эльвира МОЗАФФАРОВА, Ирек мәйданы